0
0
0
s2sdefault

ເນື່ອງໃນໂອກາດສະເຫຼີມສະຫຼອງການສ້າງຕັ້ງສະຖານບັນການສຶກສາທາງດ້ານກະສິກຳ-ຄະນະກະເສດສາດ ຄົບຮອບ 42 ປີ (09/12/1975-09/12/2017), ໃນ​ວັນ​ທີ 06 ທັນ​ວາ, 2017 ຄະ​ນະ​ກະ​ເສດ​ສາ​ດ​ໄດ້​ເປີດກອງປະຊຸມວິຊາການພາຍໃຕ້ຫົວຂໍ້ ວິທະຍາສາດກະສິກຳ, ເຕັກໂນໂລຊີ ແລະ ການພັດທະນາ​ຂຶ້ນ​ທີ່​ສະ​ໂມ​ສອນ ຄະ​ນະ​ກະ​ເສດ​ສາດ (ວິ​ທະ​ຍາ​ເຂດ​ນາ​ບົງ),

ມະ​ຫາ​ວິ​ທະ​ຍາ​ໄລ​ແຫ່ງ​ຊາດ, ໂດຍໃຫ້​ກຽດ​ເປັນ​ປະ​ທານ​ຂອງ​ ທ່ານ ຮ​ສ. ຟອງ​ສະ​ມຸດ ສຸ​ທຳ​ມະ​ວົງ ຄະ​ນະ​ບໍ​ດີ ຄ​ະ​ນະ​ກະ​ເສດ​ສາດ ແລະ ທ່ານ ຮ​ສ. ສົມ​ພັນ ປາ​ຊູ​ວາງ ຮອງ​ຄະ​ນະ​ບໍ​ດີ ຄະ​ນະ​ກະ​ເສດ​ສາດ, ມີ​ບັນ​ດາ​ຄູ​ອາ​ຈານ, ນັກ​ຄົ້ນ​ຄວ້າ ພາຍ​ໃນ ຄ​ກ​ສ ຈຳນວນ 18 ທ່ານ ແລະ ນັກສຶກສາປີ 3 & 4 ຂອງ 6 ສາ​ຂາ​ວິ​ຊາ ແລະ ນັກສຶກສາຕໍ່ເນື່ອງປີ 1&2 ສາ​ຂາ​ປູກ​ຝັງ ແລະ ລ້ຽງ​ສັດ ທັງ​ໝົດ 229 ຄົນ ເຂົ້າ​ຮ່ວມ.

ຄຽງ​ຄູ່​ກັບ​ການສ້າງກິດຈະກໍາເພື່ອສະເຫຼີມສະຫຼອງການສ້າງຕັ້ງສະຖານບັນການສຶກສາທາງດ້ານກະສິກຳ-ຄະນະກະເສດສາດ​ ຄົບຮອບ 42 ປີ ແຫ່ງນີ້​ແລ້ວ, ກອງ​ປະ​ຊຸມດັ່ງ​ກ່າວຍັງ​ເປັນ​ໂອ​ກາດ​ທີ່​ດີ​ສຳ​ລັບການນໍາສະເໜີຜົນງານຄົ້ນຄວ້າຂອງຄູອາຈານ, ແລະ ເປັນການແລກປ່ຽນບົດຮຽນ, ຮັບຮູ້ແຫຼ່ງຂໍ້ມູນໃໝ່ຂອງຄູອາຈານ, ພະນັກງານ ແລະ ນັກສຶກສາ ໂດຍ​ສະ​ເພາະ​ແມ່ນ​ຜົນ​ງານຄົ້ນຄວ້າໃນໄລຍະສົກປີ 2016-2017, ໂດຍ​ສະ​ເພາະການຄົ້ນຄວ້າ ສາຂາວິຊາປູກຝັງ, ລ້ຽງສັດ, ປະມົງ, ສັດຕະວະແພດ, ເສດຖະກິດຊົນນະບົດ-ເຕັກໂນໂລຢີອາຫານ ແລະ ປ້ອງກັນພືດ. ຫົວຂໍ້ທີ່ນຳມາສະເໜີໃນກອງປະຊຸມ ຈຳນວນສ່ວນຫຼາຍແມ່ນໄດ້ຕິດພີມວາລະສານ ຄກສ ແລະ ວາລະສານສາກົນ ທັງ​ໝົດ 14 ຫົວ​ຂໍ້.

ພ້ອມ​ດຽວ​ກັນ​ນີ້ ​ທ່ານ ຮ​ສ. ຟອງ​ສະ​ມຸດ ສຸ​ທຳ​ມະ​ວົງ, ຄະ​ນະ​ບໍ​ດີ ຄະ​ນະ​ກະ​ເສດ​ສາດ ຍັງ​ໄດ້​ເລົ່າ​ມູນ​ເຊື້ອ​ປະ​ຫວັດ​ຄວາມ​ເປັນ​ມາ​ໃນ​ການ​ສ້າງ​ຕັ້ງ, ຜົນ​ງານ ແລະ ໝາກ​ຜົນ​ຂອງ​ການ​ພັດ​ທະ​ນາສະຖານບັນການສຶກສາທາງດ້ານກະສິກຳຈົນ​ມາ​ເຖິງຄະນະກະເສດສາດ ຕະ​ຫຼອດ​ໄລ​ຍະ 42 ປີ  ​ໃຫ້​ແກ່ບັນ​ດາຄູ​ອາ​ຈານ, ພະ​ນັກ​ງານ ແລະ ນັກ​ສຶກ​ສາ​ ​ຮັບ​ຟັງ. ໃນ​ໂອ​ກາດ​ດຽວ​ກັນ​ນີ້, ບັນ​ດານັກ​ສຶກ​ສາ​ຍັງ​ໄດ້​ຮັບ​ຟັງທິດ​ທາງ​ໃນ​ການ​ຊອກ​ຫາ​ວຽກ​ເຮັດ​ງານ​ທຳ ຫຼັງ​ຈາກ​ສຳ​ເລັດ​ກ​ານ​ສຶກ​ສາ ຈາກ​ປະ​ສົບ​ການ​ທີ່​ຖອດ​ທອດ​ໄດ້ຈາກ *​ການສຶກສາເສັ້ນທາງປະກອບອາຊີບທົ່ວປະເທດຄັ້ງທີ 2 ຂອງສິດເກົ່າຄະນະກະເສດສາດ ມຊ* ນຳ​ສະ​ເໜີ​ໂດຍ ທ່ານຮ​ສ. ສົມ​ພັນ ປາ​ຊູ​ວາງ ຮອງ​ຄະ​ນະ​ບໍ​ດີ ຄະ​ນະ​ກະ​ເສດ​ສາດ.